ദോഹ: ഖത്തർ അമീർ ശൈഖ് തമീം ബിൻ ഹമദ് അൽതാനിയും അമേരിക്കൻ പ്രസിഡന്റ് ഡൊണാൾഡ് ട്രംപും തമ്മിൽ ടെലിഫോൺ സംഭാഷണം നടത്തി. മേഖലയിലെ നിലവിലെ സാഹചര്യം, സമാധാനം ശക്തിപ്പെടുത്തുന്നതിനുള്ള അന്താരാഷ്ട്ര ശ്രമങ്ങൾ, സംഘർഷങ്ങൾ ലഘൂകരിക്കാനുള്ള നടപടികൾ എന്നിവ ഇരുനേതാക്കളും ചർച്ച ചെയ്തു.മിഡിൽ ഈസ്റ്റിലെ നിലവിലെ സംഭവവികാസങ്ങളും സമാധാനവും സുരക്ഷയും ഉറപ്പാക്കാൻ ആവശ്യമായ നയതന്ത്ര നീക്കങ്ങളും സംഭാഷണത്തിൽ വിഷയമായി.പ്രതിസന്ധികൾ ചർച്ചകളിലൂടെയും സമാധാനപരമായ മാർഗങ്ങളിലൂടെയും പരിഹരിക്കേണ്ടതിന്റെ പ്രാധാന്യം ഇരുനേതാക്കളും ഊന്നിപ്പറഞ്ഞു. ഇതിനായുള്ള ഏകോപനവും കൂടിയാലോചനകളും തുടരാൻ തീരുമാനിച്ചു.ഖത്തറും അമേരിക്കയും തമ്മിലുള്ള ദൃഢമായ തന്ത്രപ്രധാന ബന്ധം വിവിധ മേഖലകളിൽ കൂടുതൽ വികസിപ്പിക്കുന്നതിനെക്കുറിച്ചും ഇരുനേതാക്കളും വിലയിരുത്തി.പ്രാദേശികവും അന്തർദ്ദേശീയവുമായ വിഷയങ്ങളിൽ ഖത്തറും യുഎസും തമ്മിലുള്ള സഹകരണം കൂടുതൽ ശക്തമാക്കുന്നതിന്റെ ഭാഗമായാണ് ഈ ഫോൺ സംഭാഷണം നടന്നത്.
